Fondacioni Albiz, në bashkëpunim me Qendrën për Zhvillim të Qëndrueshëm ALKA, realizoi një trajnim dyditor të fokusuar në efikasitetin energjetik (EE) dhe burimet e ripërtëritshme të energjisë (RES) në sektorin e turizmit rural.

Trajnimi mblodhi përfaqësues të komunave, pronarë dhe përfaqësues të bizneseve, si dhe aktorë të tjerë të interesuar nga Rajoni i Planifikimit të Shkupit. Përmes diskutimeve dhe shkëmbimit të përvojave, pjesëmarrësit patën mundësinë të njihen me mundësitë konkrete për përdorim më efikas të energjisë dhe zbatimin e zgjidhjeve të qëndrueshme në bizneset rurale.

Gjatë trajnimit u trajtuan tema që lidhen me kursimin dhe menaxhimin efikas të energjisë, përdorimin e burimeve të ripërtëritshme të energjisë, teknologjitë e gjelbra, si dhe mundësitë për mbështetje financiare për investime në efikasitetin energjetik dhe energjinë e pastër.

Një pjesë e rëndësishme e trajnimit ishte edhe diskutimi mbi sfidat me të cilat përballen bizneset rurale dhe mënyrat se si investimet në efikasitet energjetik dhe burime të ripërtëritshme mund të kontribuojnë në uljen e kostove, rritjen e qëndrueshmërisë dhe zhvillimin afatgjatë të turizmit rural.

Ky aktivitet u realizua në kuadër të projektit “Energy Wise – Empowering Rural Tourism through RES & EE”, i zbatuar nga Fondacioni Albiz dhe Qendra për Zhvillim të Qëndrueshëm ALKA, me mbështetjen e BOOST Balkans, ALDA – European Association for Local Democracy dhe AFD – Agence Française de Développement.

Trajnimi përfaqëson një nga aktivitetet e projektit që synon të rrisë njohuritë dhe kapacitetet e aktorëve të turizmit rural për përdorimin e energjisë në mënyrë më efikase dhe për adoptimin e zgjidhjeve të qëndrueshme dhe miqësore me mjedisin.